Buwan ng Wikang Pambansa 2010, Matagumpay na Ipinagdiwang

Ang pagtatanghal ng sabayang pagbigkas ng College of Education

            Masaya, makulay, at hindi malilimutan ang mga pagtatanghal na idinaos ng mga guro at mag-aaral ng Mabalacat College sa pagtatapos ng Buwan ng Wikang Pambansa noong Agosto 25, 2010 sa ganap na ala-una ng hapon sa Events Centre, SM Clark, Pampanga.

Sa ilalim ng temang Sa Pangangalaga ng Wika at Kalikasan, Wagas na Pagmamahal Talagang Kailangan, nagpasiklaban sa galing at talino ang mga mag-aaral sa iba’t-ibang kolehiyo. Sila ay naglaban-laban sa larangan ng Madulang Sabayang Pagbigkas, Makabagong Indak sa Makalumang Tugtugin, Pag-awit ng Isahan, Sayaw ng Lahi, Lakan at Lakambini ng Wika 2010.

Sa larangan ng Madulang Sabayang Pagbigkas ng akdang Ang Kamay ni Amado V. Hernandez, ang napakagandang pagtatanghal ng mga mag-aaral ng College of Education ang nagbigay daan sa pagpanalo nito ng Unang Gatimpala. Pumangalawa naman ang CITE.

Ang Malapiyestang Pagtatanghal ng Sayaw ng Lahi ng College of Hotel and Restaurant Management.

Sa larangan naman ng Makabagong Indak sa Makalumang Tugtugin, ang masaya at kamangha-manghang sayaw ng College of Hotel and Restaurant Management and Tourism ang ginawaran ng Unang Gatimpala. Pumangalawa ang IT.

Sa larangan ng Sayaw ng Lahi sa tugtug ng Atin Ko Pung Singsing, ang magara at malapiestang produksiyon ng College of Education ang nag-uwi ng Unang Gatimpala. Pumangalawa ang tampok ng HRMT. Sa Pag-awit ng Isahan, si Ivy S. Maluya ng HRMT ang itinanghal na kampeonato. Siya ay umawit ng Lipad ng Pangarap ni Dessa.

Sa labanan ng angking kisig at talino, si G. Carlo A. Simbajon ng College of Information Technology Education ang nanalo bilang Lakan ng Wika 2010. Habang Sa labanan ng angking ganda at talino, si Bb. Misty Ann C. Nabong ang nakoronahan bilang Lakambini ng Wika 2010.

Sa mga guro at kawani naman, Si G. Rolando M. Baluyut, guro ng NSTP, ang nanalo ng Maka-Pilipinong Kasoutan. Si Bb. Edwina M. Dungca, guro ng English, ang nanalo sa Maka-Pilipinang Kasoutan.

            Sina G. Lindo Asahar, G. Melchor Balboa, G. Arvin Roncal, at Gng. Rosanna E. Ramos ang nagsilbing mga hurado sa mga patimpalak. Isa na naman itong natatanging tagumpay na naitaguyod ng Departamento ng Filipino sa pamumuno ng kanilang Koordineytor na si G. Christian Allan C. Cagano, katuwang ang mga opisyales ng Filipino Club ’10 sa ilalim ng pamumuno no G. Richard V. Hernandez.